Belaef Nirbik

Belaef Nirbik is de ultieme Nirbikse dörpskwis veur jónk en oud. De iersjte editie zal gehoute waere op ellef juni op ein locatie die geer zelf bepaalt. Dat kènt bieveurbeeld zeen: eur hoeskamer, de sjtamkroeg of ’t vereinigingslokaal. De bedoeling is, dat geer uch insjrief mèt minimaal 8 (en maximaal 12) persone en geer sjpeelt veur eur eige dörpsdoel. Geer kènt hiebie dinke aan ’t sjpekke van de vereinigingskas, nuuj pekskes veur de vereiniging, of of ’t plaatse van nog ein bank örges in ’t dörp.

’t Begint mèt ’t samesjtèlle van ein team van 8 tot maximaal 12 luuj. Sjpeelt geer mèt minder dan 8 man, dan besjteit de kans dat geer neet alles aafkriegt. Eder team wies ein opperhoofd aan dae namens ’t team kontak ónderhilt mèt de organisatie. Daobie bedink eder team eine naam dae zónger probleme nao boete gebrach kènt waere. Insjrieve kènt sjtrak via de website.

Op teen juni waere alle leiders op ein later te bepale tiedsjtip aan ’t begin van d’n aovend (zègk zes oere) urges (maake veer laater bekint wao dat is) verwach  óm ’t kwisbook op te haole. Diezelfde opperhoofde levere datzelfde kwisbook dan daezelfde aovend auch weer in op diezelfde lokasie op ein later te bepale tiedsjtip (zègk èllef oere). Klómmele womèt geer op internet kènt, zeen neet allein erg handig óm zake op te zeuke, mer zelfs aan te raoje. Geer mót namelijk auch hie en dao ein filmke of ein foto make en dees vervolgens doorsjture nao de jury of uploade nao de website. Daobie mót de leider op eder moment te bereike zeen. Vraoge en opdrachte höbbe neet allein betrèkking op Nirbik, mer kènne auch euver minder belangrieke zake oet de res van de waereld gaon. Auch zult geer ’t dörp in motte om bepaalde vraoge of opdrachte oet te kènne veure!

Op d’n aovend zelf probere veer, es dat meugelijk is, al eine tösjesjtand op de site te zètte, de definitieve oetsjlaag weurt bekènt gemaak op veerentwintig juni  in Café zaal de Keulsjteeg. Veer make d’r dan mèt alle teams same nog ‘s eine gezellige aovend van.

Dörpsdoel

Eder team sjpeelt veur eur eige dörpsdoel. Dat mot ein sociaal maatsjappelijk doel zeen, mèt anger weurd ein doel dat betrèkking haet op de intermiensjelijke samelaeving en/of de aopenbare ruimte.

Dènk aan:

• ein bank in ’t veld of dörp
• nuuj bloombek op ut callistusplein
• Ein sjtandbeeld
• sjpeeltoesjtelle veur de openbare ruimte
• sjpelle veur de hoeskamer
• nuuj pekskes veur de vereiniging
• opknapbeurt van de weagkruuskes
• etc…